3歲孩子最近有異常行為，是否有精神病？

ireneho

我的兒子差不多3歲半，最近1兩星期發生一些異常行為，有沒有人可以幫忙！
孩子上星期六晚上8點在梳化睡着，我們趁他睡着幫他洗頭吹頭(因他很抗拒洗頭，每次堅拒洗頭，又說很驚洗頭)，然後放他在床上幫他換衫之際，他突然醒了又哭起來，怎哄也不肯收聲，然後他說唔中意洗頭因怕水入眼耳，他繼續大哭很久，給他吃糖停了一會又繼續大哭，跟住又說自己脚痛要到廚房拿掃把，要用掃把掃脚後又要用手拿掃把上的灰塵擦面，我阻止他一路抱他，他又說要關房門至漆黑一片後倦極入睡。
今天發生異常行為是在早上時候，他哭着要外婆跟他一起脫褲子向家中神櫃撒尿，大吵大鬧了很久，後來因尿不多才說要多喝水而沒有繼續！我真的好擔心，不知他是撞邪還是有精神病。
他平時已是個愛哭的孩子，且有多次撞親頭紀錄，我們只幫他塗去瘀膏，昨天他又撞到抬在頭頂上。
而且他晚上睡着了也會磨牙，是否太緊張？(他在唸nursery)
我只有他一個孩子，如果他有精神病我也不知怎算？
有沒有專業人士可解答？需要帶他看醫生嗎？

s1006701

為何你會覺得他有這些行為, 就是有精神病呢????

他很抗拒洗頭, 你覺得有問題
他好叻仔咁話你知, 因為佢唔鐘意D水入耳仔
佢都講左你知個原因
咁你以前有無做過D野, 令D水唔好入耳仔呢?
例如有無諗過買耳塞俾佢洗頭果時用?
或者用洗頭專用的頭蓬俾佢戴呢?

洗完頭又會唔會用棉棒幫佢清潔耳仔呢?

佢宜家都3歲半咯, 細個洗頭有無已經好驚?

其實我個大仔(宜家2歲半)細個都有驚過
之後我就每次同佢洗頭都好似玩水咁, 一路同佢講"落雨啦"一路同佢洗
又有用個洗頭專用的頭蓬

咁一路玩一路到宜家,
佢今朝自己刷牙果時仲竟然幫自己洗埋頭, 仲叫我去睇佢
真係俾佢激死

至於吹頭, 你趁佢訓左先吹咪仲嚇死佢
我個仔都唔鐘意我突然拎個風筒同佢吹頭
你仲要佢訓個果時同佢洗同埋吹頭, 你有無同佢講聲先架?

小朋友訓左的時候, 你唔好以為佢訓左就唔知先得喎
咁樣俾你嚇一嚇, 唔喊先奇啦

之後佢話要拎掃把
佢係咪好鐘意掃地架
如果係, 佢好明顯就係好緊自己鐘意做嘅野黎安慰返自己啦

咁再之後佢話要"關房門至漆黑一片"
又有咩問題呢????
訓覺你平時要開燈訓架???

咁難得佢咁叻仔唔怕黑, 要黑哂先訓, 幾好呀
你知唔知人要喺完全黑暗的環境下訓覺, 個人的身體先會有100%的完全休息架
因為黑暗中人腦下方的松果體可以分泌聚黑激素，現在稱為褪黑激素(melatonin)，此物質能幫助人類腦細胞鬆弛，進入睡眠狀態。
而有啲人喺黑暗的環境時, 人係會放鬆一點

之前佢你咁嚇親, 佢想間房黑啲都無錯呀

至於你話他要在家中神櫃撒尿.....
佢戒左片幾耐呀??
之前有無試過喺神櫃前咁做過???

點解佢會突然喊同埋要咁做?
佢之前做左啲乜黎???

你覆返我先啦

至於磨牙,我個仔都有
我自己都會有時有
有時個人緊張, 或者心理壓力大都會咁

但係要記住, 唔係長期磨牙對健康的影響係十分十分少的

你建議媽咪你放鬆自己先
你個仔的行為我覺得只係普通3歲小朋友的行為表現
而你竟然咁快就諗佢係咪有精神病, 甚至覺得佢撞邪

我聽到你咁講我都覺得好驚
因為我會覺得你平時對佢的行為的要求會係一個唔係3歲小朋友


我覺得宜家先要做嘅係你自己唔好咁緊張先啦
有好多小朋友的行為都係因為大人又或者環境轉變而影響到
唔好咁擔心

等你答返我架

adakwongkl

首先, 不要迫佢做一些佢害怕既野.  你是要有耐性有方法地慢慢幫佢克服.
你侯佢訓著覺就搵水淋佢又搵風吹佢, 真系不要說是小朋友, 連大人都俾你嚇親啦.  
你咁樣返而弄得佢連訓覺都無安全感.  陰影哩樣野系一世架, 難怪上面位家長咁激動.

有時小朋友心情很激動, 大哭時,講什麼道理唔都會聽到.  你先要安撫佢才對.
小朋友是很易feel到壓力的, 當驚慌同緊張既時候做左d 大人認為"怪異" 既行為是一點都唔出奇
好似我仔(3歲幾)一樣都好怕用花洒洗頭, 咪唔好用住囉, 得閒同佢去戲水池,玩水熗同佢玩多d;  當佢好緊張時又會成隻手窒晒入口, 其實佢系唔識表達同處理, 佢做左會安心d.  
其實d行為都是情緒宣洩既一種.  如果佢d行為唔影響生命安全, 你咪由佢做完, 個人安定了才說教lor.

別要時常覺得佢大哭=耍脾氣  其實可能系你地做唔到佢表達既野, 佢先咁燥. 根本系大家唔明大家.  
你要先建立好親子關係(唔系縱, 係要令佢安心信任你), 佢先會聽你話架.
希望你唔好再用錯力啦.

s1005951

以上二位家長講得好好, 你真係先要冷靜, 再想想是否自己用錯方法, 我個囡 三歲幾時也不喜歡洗頭, 原因是佢吳鍾意水入耳和眼, 後來叫佢雙手扶住個水桶(小朋友站在桶外), 目的是叫佢彎腰, 直到宣家都沒問題啦, 你不妨試吓,  平時也要多贊賞小朋友, 小朋友的信心有時是靠我d家長的贊賞而來, 得閒同佢去戲水池,玩水熗同佢玩多d; 讓佢接觸多d水, 自然就吳會怕啦, 我個女宜家不知几鍾意去泳池, 最好找多几個小朋友一齊去, 到時有様學様, 好快佢就好鍾意玩水啦, 也可以教佢用說話代替哭. 最後希望你開心d啦! 你開心, 佢才會開心, 其實你時刻都影響小朋友架.

ceciliawwy1

我仔仔有同樣怕洗頭的情況, 現在我提議他用手巾仔遮掩眼晴, 他勉強可以接受和催逼我要洗快一點.  他還怕用耳探探熱針, 怕吹風機等有聲響的東西. 我曾聽說可能跟感覺統合有關. 我現正在健康院排期看醫生(需要兩個月), 看看是否真的有關. 假如你心急點, 你亦可以嘗試到坊間看看有關感覺統合治療.

至於其他行為, 不大瞭解.

s1006787

一個3歲幾的小朋友何來會有精神病? 首先妳真的太緊張了。每個小朋友都是獨一無二的, 你個囝囝天生的氣質可能是會多喊一些。有好多小朋友都不愛洗頭, 我個囡囡都係。我會叫她抬高小小頭, 叫她數二十下, 然後幫她沖頭, 其實都好少會入眼, 入耳的。又或者妳嘗試沖頭時說個故事給他聽, 分散他的注意力, 但千萬不可待他睡著時幫他洗頭。

我個囡有時會因一些我們大人認為很小的事情而大發脾氣, 大吵大鬧, 硬功/軟功都試過無效, 最後唯有講其它東西, 不要再停留在導致發脾氣那個話題上, 她慢慢會軟化。 其實你囝囝這個年紀都是關乎 trouble two問題, 待他再大一點應該會好些。